АҞӘА, ԥхынгәы 15 – Sputnik. Аполитолог Сергеи Михеев иажәақәа рыла Европа имҩаԥысуа атеррористтә актқәа шаҳаҭра руеит: "Актәи – Европа имҩаԥнагаз амиграциатә политика лҵшәадахеит. Аҩбатәи – Европа ашәарҭадаратә система аус амуит. Европа атәылауаа рыхьчара алшом. Ухы узымыхьчозар аҽак алацәажәара заҭахузеи".
Михеев игәаанагарала Евроеидгыла аконцепциагьы лҵшәадоуп. "Евроеидгыла анапхгаҩцәа ргәы иаанагон уахь инеиуа зегьы иаразнакы европауаан иҟалоит ҳәа, аха ус акәымхеит. Атеррористцәа зегьы иддырҳауеит: ҳара шәаҳшьлоит. Макьаназы Европа урҭ ирҿагылартә еиԥш иҟаны избом".
"Макьаназы Европа Америка ианаҭо ақәыӷәӷәара иацныҟәаны Москва иаҿаӷыӷуеит. Москвеи дареи аимабзиара амҩа ишықәлаша ҳәа иаҳҳәо иазхьаԥшырц рҭахӡам. Атерактқәа зегьы раасҭа америкатәи анырра еиҳа иӷәӷәоуп", — иҳәоит аексперт.
Москватәи Карнеги Центр ахеилак алахәыла Алексеи Малашенко иазгәеиҭоит атеракт аныҟало зыԥхьагәаҭашьа шамам. "Уи аԥыхра алшап ҳәа сыҟам. Ниццатәи атеракт уаанӡатәиқәа иреиԥшым. Уаанӡа аидарамҩангагақәа аӡәгьы ихы иаимырхәацызт", иҳәоит иара.
Малашенко иазгәеиҭоит "Атерактқәа иҿыцу ҭагылазаашьоуп. Амигрантцәа аҿыц ԥсҭазаара иаҳаршьцылоит ҳәа европаа ирҳәо иаҟәыҵны атерактқәа разыԥхьагәаҭареи раԥырҟәҟәаареи ирылагар еиӷьуп", ҳәа.
Франциа, Ницца аҭыԥ змаз атеррористтә атака 84 ԥсҭазаара ҿахнаҵәеит. 200-ҩык рҟынӡа ахәрақәа роуит. Урҭ рҟынтәи 54-ҩык хәыҷқәоуп.
