Ԥсоу ақыҭан инагӡаны аусура иалагеит афельдшертә-акушертә ҭыԥ

© Sputnik / Саида ЖьиԥҳаԤсоу ақыҭан инагӡаны аусура иалагеит афельдшертә-акушертә ҭыԥ
Ԥсоу ақыҭан инагӡаны аусура иалагеит афельдшертә-акушертә ҭыԥ - Sputnik Аҧсны
Анапаҵаҩра
НовостиTelegram
Акапиталтә ремонт ашьҭахь, Ԥсоу ақыҭан инагӡаны аусура иалагеит афельдшертә-акушертә ҭыԥ.

ГАГРА, ԥхынгәы 21 — Sputnik, Саида Жьиԥҳа. Аԥсны аџьынџьтәылатә еибашьра еилгеижьҭеи, Ԥсоу ақыҭан афельдшертә-акушертә ҭыԥ аус ауан иазалхыз, зҭагылазаашьа уашәшәырыз ахыбраҟны. Ақыҭа аиҳабыра изныкымкәа ари апроблема Гагра араион Ахадараҟны иқәдыргылахьан.

Шықәсқәак раԥхьа, Гагра араион Ахадара аиҳабыс Беслан Барцыц даныҟаз, ари аҭагылазаашьа аԥсахра иҽазишәеит. Иара ибзоурала нап аркын афельдшертә-акушертә ҭыԥ иазалхыз ахыбра ҿыц аҟны акапиталтә-ремонт амҩаԥгара.

Иахьа, афельдшертә-акушертә ҭыԥ иааузымдыруа ахаҿра аԥсахит.

"Сара Ԥсоу ақыҭан, афельдшертә-акушертә ҭыԥ аҟны аус зуоижьҭеи 45 шықәса ҵуеит. Иара убас рымаҵ зуоит ақыҭақәа Сулеви Мкьалрыԥшьи рҟны инхо ауааԥсырагьы. Сыхәҭакахьала, ақыҭаҟны афельдшертә-акушертә ҭыԥ қәнагала аусура алзыршаз Беслан Барцыц иҭабуп ҳәа иасҳәоит", — лҳәеит афельдшертә-акушертә ҭыԥ аиҳабы Жужуна Карокиан.

Иахьа араҟа аус руоит адкыларҭа аҟәша, ахәыҷтәи апроцедуратәи акабинеҭқәа. Дара еибыҭоуп иахәҭоу амедицинатә маругала, ахәшәла, аҩнымаҭәала. Уи аҿы ацхыраара ҟаиҵеит Гагратәи араионтә хәышәтәырҭа аҳақьым хада Виачеслав Аргәын. Иаанханы иҟоу агинекологиатә кабинеҭ ауп. Афельдшер Жужуна Карокиан абри аҟара аус анымҩаԥгаха, агәра лгоит, Гагра араион Ахадара аиҳаб ҿыц Заур Бганба уи аартразы ацхыраара риҭап ҳәа.

Иахьа, Ԥсоу ақыҭан иаарту афельдшертә-акушертә ҭыԥ рымаҵ ауоит ҩнызқьҩык инарзынаԥшуа ауааԥсыра, урҭ рхыԥхьаӡараҿы иҟоуп 300-ҩык ахәыҷқәа.

© Sputnik / Саида ЖьиԥҳаԤсоу ақыҭан инагӡаны аусура иалагеит афельдшертә-акушертә ҭыԥ.
Ԥсоу ақыҭан инагӡаны аусура иалагеит афельдшертә-акушертә ҭыԥ. - Sputnik Аҧсны
Ԥсоу ақыҭан инагӡаны аусура иалагеит афельдшертә-акушертә ҭыԥ.

"Ҽнак иалагӡаны, афельдшертә-акушертә ҭыԥ иаднакылоит 30-ҩык рҟынӡа ачымазцәа. Уаанӡа, хыԥхьаӡара рацәала ауааԥсыра рымаҵ аура ҳалымшозҭгьы, иахьа зегь рыла ҳаиқәшәоуп. Ачымазцәа ирыцны иааиуагьы, акабинеҭқәа ианыҩнаԥшлак, ҳаргьы ҳачмазаҩхар ҳҭахыуп, арахь лассы-лассы ҳамҩахыҵларц, ҳәа алаф рҳәоит", — ҳәа азгәалҭоит аҳақьым.

Афельдшертә-акушертә ҭыԥ аус ауоит асааҭ 14-нӡа, анаҩс Жужуна Карокиан, лара лҟынӡа анеира зцәыцәгьоу ачымазцәа ацхыраара лырҭарц дрызцоит рыҩныҟа.

Ажәабжьқәа зегьы
0