АҞӘА, ԥхынгәы 28 – Sputnik, Бадраҟ Аҩӡба. Аиҳабыра рыԥхьатәара аоппозициаа иҟарҵо адҵақәа ирхымҟьаӡеит, иҳәеит Аԥсны Ахада Рауль Ҳаџьымба имҩаԥигаз абрифинг аҟны.
"Аминистрцәа Реилазаараҟны аԥсахрақәа шыҟалоз атәы сара уаанӡагьы исҳәахьан. Аиҳабыра рыԥхьатәара аоппозициаа иҟарҵо адҵақәа ирхымҟьаӡеит, иахьатәи Апарламент аилатәара азҵаарақәагьы ирыдҳәалаӡам", — иҳәеит Ҳаџьымба.
Иара иазгәеиҭеит Аминистрцәа Реилазаара атәыла абиуџьет аизырҳаразы иҟанаҵаз шырацәоу.
"Иааидкыланы ицәгьамыз алҵшәақәа ыҟан, аха уи иаанагом урҭ азхон ҳәа. Жәлар Реизарахь есышықәсатәи сынашьҭымҭаҟны иқәсыргылаз азҵаарақәа реиҳарак ӡбамкәа иаанхеит", — иҳәеит иара.
"14 напынҵа рҟынтәи хәҭакала инагӡаз жәба роуп. Егьырҭ рганахьала информациа сымам арахь аҿҳәарақәа зегьы ирхыԥахьеит", — иҳәеит иара.
Иара иазгәеиҭеит аамҭакала Аԥыза-министр иҟамзаара Аминистрцәа реилазаара аусура ишаԥырхагамхо.
"Аиҳабыра аус шыруц ируеит. Анапхгаҩ ҿыц днеиаанӡа Аԥыза-министр инапынҵақәа неигӡоит Аԥыза-министр актәи ихаҭыԥуаҩ Шамил Аӡынба", ҳәа азгәеиҭеит иара.
Рауль Ҳаџьымба агәра игоит Аԥыза-министр икандидатура атәыла Апарламент ишьақәнарӷәӷәар шакәу.
