АҞӘА, ԥхынгәы 29 – Sputnik, Рада Ажьиԥҳа. Аԥсны Аминистрцәа Реилазаара ибзиоуп ҳәа иаднакылеит Аԥсны Аҳәынҭқарреи Урыстәылатәи Афедерациеи рнапхгара рыбжьара аҵареи аҟазареи реицазхаҵаразы Аиқәшаҳаҭра апроект.
"Аԥсны "Аҵараз азакәан" ахьыҟам инамаданы абри аусхк аганахьала иарбанызаалак еиқәшаҳаҭрак ыҟамызт. Ари Аиқәшаҳаҭра иалнаршоит адиплом змоу аҟазауаа рҵара инақәыршәаны русура алыршара", — иҳәеит аминистр Адгәыр Какоба.
Иара убасгьы иазгәеиҭеит Аиқәшаҳаҭра ахарҭәаарақәеи аԥсахрақәеи аҭахны ишыҟоу.
"Аԥсахрақәеи ахарҭәаарақәеи алаагалоит "Аҵаразы азакәан" анҳадаҳкылалак ашьҭахь", — иҳәоит иара.
Аԥсны Аҳәынҭқарреи Урыстәылатәи Афедерациеи рнапхгара рыбжьара аҵареи аҟазареи реицазхаҵаразы Аиқәшаҳаҭра аминистрцәа еицҿакрыла ирыдыркылеит.
