АҞӘА, нанҳәа 3 — Sputnik. Ҭырқәтәыла атәылауаа Аԥсны Аҳәынҭқарра алаларазы азин роурц арзаҳалқәа аналарҵо иаҭаху адокументқәа реиқәыԥхьаӡа иалагалоуп адырранҵа уи ауаҩ аӡбара шиқәмызи ашьаус дшақәымшәаци рзы, ҳәа ҳарҳәеит Аԥсны адәныҟатәи аусқәа рминистрраҟны.
Аԥсны адәныҟатәи аусқәа рминистрра аофициалтә саит аҟны иарбоуп Аԥсны алаларазы ишахәҭоу апаспорт ахкьыԥхьаа амазаареи аелектронтә ҟазшьа змоу анкетеи.
"Аԥсны Аҳәынҭқарра алалареи Аԥсны Аҳәынҭқарра алҵреи" азакәан инақәыршәаны визада атәыла иалалар рылшоит Урыстәыла, Никарагуа, Тувалу, Приднестровиатәи Молдавиатәи ареспубликеи Аахыҵ Уаԥстәылеи ртәылауаа.
