КАЦИКЫҬ, нанҳәа 10 — Sputnik, Бадраҟ Аҩыӡба. Гәылрыԥшь араион Кацикыҭ ақыҭан иҟоу аӡахәа аарахырҭа даҭааит Рауль Ҳаџьымба, ахаша нанҳәа 10 рзы.
Аҳәынҭқарратә еилакы "Аԥсны аӡқәеи аҩқәеи" анапхгаҩы Николоаи Ачбеи агроном Лев Гәырџьуеи атәыла Ахада дразҵааит аӡахәааӡарҭақәа рҿы имҩаԥгоу аусқәа ртәи, уа аус зуа ауаа рхыԥхьаӡареи.
Иара убас Ҳаџьымба азҿлымҳара аиҭеит, сынтәатәи ашықәс азы хыԥхьаӡарала ажь шаҟа рауа атәы.
Лев Гәырџьуа атәыла Ахада излаиеиҳәаз ала, аӡахәақәа ишрыхәҭоу ирхылаԥшуеит, аус зуа рхыԥхьаӡара 80-ҩык рҟынӡа инаӡоит, иара убасгьы иазгәеиҭеит ауалафахәы шдуугьы, ауаа ирҭахны аус шырымуа.
Николаи Ачба излазгәеиҭаз ала, аӡахәааӡарҭақәа ҩба рҟынтә тоннак ажь рнаҭароуп.
Ачба иажәақәа рыла, Гәылрыԥшьтәи аӡахәа аарахырҭақәа рҟынтә ироуа ажь Аԥсны иҭрыжьуа аҩқәа зегьы рзы рхы иадырхәоит.
"50 гектар адгьыл аӡахәа аарыхразы иазоужьуп, 45 гектар рҿы аӡахәа еиҭаҳауп", — иҳәеит Гәырџьуа.
Кацикыҭ (Владимировка) ақыҭаҿы ажь аадрыхуа иалагеит 2014 шықәса рзы. Аарахырҭақәа ҩба ыҟоуп.
"Ӡахәацыԥхьаӡа кьылак ажь ҿыҵуеит, уи раԥхьатәи ҽаҩроуп. Аӡахәа азҳашьеи аҿиашьеи даара ибзиоуп, ҳара иара ишахәҭоу аус адаҳулоит", — ҳәа ациҵеит иара.
Аӡахәақәа ааган Италиантәи. Аарахырҭаҿы иахьазы аус руеит 80-ҩык аҭыԥантәи ауааԥсыра.
"Избаз даара сгәы иаахәеит. Аиҭаҳатәқәа рхыԥхьаӡареи, урҭ ишырхылаԥшуеи бзиоуп. Аус зуа изларҳәаз ала, араҟа алшарақәа рацәоуп. Ауалафахәы 30-40 зны-зынла 45 нызқь мааҭ рҿынӡа инаӡоит. Ҳара ҳажәлар ара аус руларц ҳтахуп", — иҳәеит Рауль Ҳаџьымба.
Анаҩс атәыла Ахада "Аԥсны аҩқәеи аӡқәеи" азауад даҭааит, аҩқәа рыҟаҵара апроцесс дхәаԥшит.
