АҞӘА, нанҳәа 17 — Sputnik, Бадраҟ Аҩӡба. Аҩаша, нанҳәа 16 рзы Аԥсны Ахада Рауль Ҳаџьымба Ақәҵара инапы аҵеиҩит Аслан Кобахьиа Аԥсны Аԥыза-министр ихаҭыԥуаҩыси Аҩныҵҟатәи аусқәа рминистрси иаҭаразы. Ахаша, нанҳәа 17 рзы Аҩныҵҟатәи аусқәа рминистрра аилазаара аминистр ҿыц ддырдырын.
Атәыла Ахада аминистр ҿыц изеиӷьеишьеит аколлективи иареи еидгыланы апроблема рацәа рҿаԥхьа иқәгылоу аӡбараҿ ақәҿиарақәа.
"Аибашьра ашьҭахь иуадаҩыз аамҭақәа раан Аҩныҵҟатәи аусқәа рминистрра аилазаареи иахьатәи аминистри аусура еицаҿын. Агәра згоит уаанӡа имҩаԥысуаз аусурақәа ԥхьаҟагьы ирыцҵахоит ҳәа, еиҳагьы хра рыманы иҟалоит ҳәа", — иҳәеит атәыла Ахада.
Ҳаџьымба иазгәеиҭеит ацәгьоурақәа раарԥшра шеизырҳатәу иара убасгьы амҩатә ҭагылазаашьақәа ишырхылаԥшлатәу.
Атәыла Ахада уаанӡатәи аминистр Леонид Ӡаԥшьба ҭабуп ҳәа иеиҳәеит имҩаԥигоз аусуразы. Иара убасгьы иазгәеиҭеит абри аусхк аҟны иусура ишациҵо.
Леонид Ӡаԥшьба Аслан Кобахьиа изеиӷьеишьеит ԥхьаҟатәи ақәҿиарақәа.
Атәыла Ахада иажәақәа рыла ААР (МВД) аҟны аполитика ҭыԥ амамзароуп, аусурагьы азинеиҿкаара аиқәыршәара иазырхазароуп.
"Сара ибзианы еилыскаауеит иарбан ҭакԥхықәроу сызҵагылоу. Даара иуадаҩуп аҩныҵҟатә-ӷа иҿагылара, аха уи ада ԥсыхәа ыҟам", — иҳәоит Аслан Кобахьиа.
Аҩаша, нанҳәа 16 рзы Аԥсны Ахада Рауль Ҳаџьымба Ақәҵара инапы аҵеиҩит Аслан Кобахьиа Аԥсны Аԥыза-министр ихаҭыԥуаҩыси Аҩныҵҟатәи аусқәа рминистрси иаҭаразы
