АҞӘА, нанҳәа 19 – Sputnik, Анжелика Бениаԥҳа. Аԥхынтәи апрактика Израиль ирхыргоит ААУ "Жәларбжьаратәи аизыҟазаашьақәа" акафедра ахәбатәи акурс астудентцәа, ҳәа адырра ҳалҭеит аԥсуа студентцәа ргәыԥ анапхгаҩы Саида Возԥҳа.
Израиль астудентцәа ыҟан Фаркаме. Араҟоуп еиҳарак ачерқьес диаспора рҽеидкыланы иахьынхо.
"Израиль ачерқьесцәа реиҳараҩык ахьынхо Фаркамеи Рехании рҿоуп. Голантәи ахәқәа рҟны. Хыԥхьаӡарала 7 000-ҩык рҟынӡа ыҟоуп. Ҳара ҳаҟан ачерқьес ҭынха Ацентр аҟны. Уа ацентр адиректор Зогер Тхьеухеуе иаҳзеиҭеиҳәеит ижәлар рқьабызқәеи рҵасқәеи ртәы. Уаанӡа ачерқьес диаспора аԥсуаа аҭааны иҟамлацызт", — лҳәеит Возԥҳа.
Аиԥылара мҩаԥысит Аԥсны Ахаҭарнакс Израиль иҟоу Анри Коӷониа илшарала.
Астудентцәа Израиль рыҟазаара мҩаԥысит Аԥснытәи Аҳәынҭқарратә университети Аԥсны Аҳәынҭқарра Адәныҟатәи аусқәа рминистрреи рыцхыраарала.
