АҞӘА, нанҳәа 24 – Sputnik, Владимир Бегунов. Беслан Барцыц аминистрра аилазаара дыдирдырит аминистр ҿыц. Абри атәы ааицҳауеит ҳкорреспондент аҭыԥ аҟнытә.
"Аминистр ҿыц иҿаԥхьа идҵа хаданы иқәгылоуп ишалшо ала иаарласны Урыстәылатәи Афедерациа атәылауаҩра змам атәанчаҩцәа рсиа аиқәыршәара. Уи акраҵанакуеит избанзар ҳара иҳамоуп атәанчаҩцәа ртәанчахәы мацара хныҟәгаган измоу аҭаацәарақәа", — иҳәеит Барцыц.
Аԥыза-министр иажәақәа рыла Руслан Аџьба абри аструктураҿоуп раԥхьатәи иусуратә шьаҿақәа ахьеихигаз.
Еиуеиԥшым аамҭақәа рзы Руслан Аџьба Аԥсны Афинансқәа рминистрра КРУ азанаҭуаҩ хадас дыҟан, нас: Аԥсны Аҭҵаарадыррақәа Ракадемиа НИИЕПиТ аекономистс аус иуан. Аус иуан Аԥсны Атәанчахәытә фонд ахантәаҩыс.
