АҞӘА, цәыббра 19 – Sputnik, Бадри Есиава. Аԥсны имҩаԥысит Урыстәылатәи Афедерациа Аҳәынҭқарратә Думахь алхрақәа. Алхыҩцәа еиҳарак рыбжьы рҭиит уаҵәтәи рԥеиԥш маншәалахарц, аҭынчра ыҟазаарц. Абри атәы рҳәеит дара Sputnik акорреспондент ианиҿцәажәоз.
Урыстәыла атәылауаҩ, милаҭла иуаԥсу Лариса Бесолова иазылыԥхьаӡоит абжьыҭирахь изылшо зегьы неироуп ҳәа.
"Дарбанызаалак еиликаауазароуп ҳаԥсҭазаара иҟаҳҵо алхра ишахьыԥшу", — лҳәеит ара.
Алхыҩцәа Виачеслав Шамбеи Лариса Пачалиеи гәыӷуеит ртәанчахәқәа ирыцлап ҳәа.
Урыстәыла атәылауаҩра зманы Аԥсны инхо 90 нызқьҩык ауааԥсыра ирылшоит абжьыҭирахь анеира. Абжьыҭиразы Аԥсны иахьаҵанакуа иаартуп алхырҭатә ҭыԥқәа жәба.
Иара убасгьы алхрақәа мҩаԥысуеит урыстәылатәи адипломатиатәии аконсултәи усҳәарҭақәа ахьыҟоу атәылақәа шәкы рыҟны.
