Аԥхын 2016 шықәсазы Аԥсны Аҿартә политиказы аҳәынҭеилакы имҩаԥнагаз апроектқәа алҵшәа бзиақәа аанарԥшит ҳәа ухәар алшоит, хаҭабзиарала акы иаҵамхо, абри атәы иҳәеит Sputnik арадио студиаҟны Аԥсны Аҿартә политиказы аҳәынҭеилакы ахантәаҩы Алиас Аҩӡба.
"Сынтәеи ҵыԥхи аԥхынтәи апроектқәа еиҿҳарԥшуазар иҳалҳаршеит алагерқәа ирылахәыз аҿар рхыԥхьаӡара аизырҳара. Уи зыбзоуроу ҵыԥх иҳамаз алшарақәа раасҭа сынтәа иахьеиӷьхаз ауп. Сынтәатәи "Аԥыза 2016" атәы ҳҳәозар, егьырҭ излареиԥшымыз уи ауп, раԥхьа иргыланы асасцәа рацәаҩны иаҳҭан. Апроект иалахәын Аахыҵ Уаԥстәылантәи, Ҭырқәтәылантәи, Шьамтәылантәи ихынҳәыз ҳџьынџьуаа аҿар. Дара апроект ралархәра азныказы маҷк ҳацәшәеит, избан акәзар абызшәа азымдырра рԥырхагахар ҳәа, аха акымзарык проблемак ҳмоуит, уимоу рнапы еикәыршаны, пату еиқәҵаны имҩаԥысит. Ажәакала, алагер апрограмма ҭбаан, аҵаратә процесс гәылҭәаан. Апроект хықәкы хадас иамоуп, аҿар мырааԥсаӡакәа аҵаратә процесси рыԥсы ршьаны аҟаҵара", ҳәа иҳәеит Аҩӡба.
Алиас Аҩӡба иажәақәа рыла, уажәазы имҩаԥырго апроектқәа реиҳарак аԥхын аамҭазы акәзар, иаарласны аӡынгьы еиуеиԥшым ахырхарҭақәа рыла алагерқәа риеҿкаара рнапы адыркуеит.
Аԥсны Аҿартә политиказы аҳәынҭеилакы ахантәаҩы Алиас Аҩӡба, инаҵшьны иазгәеиҭеит имҩаԥырго апроектқәа зегьы хылаԥшреи, авагылареи шаиҭо Аҳәынҭкаарр ахада Рауль Ҳаџьымба.
