АҞӘА, цәыббра 21 – Sputnik, Роберт Џьопуа. Атәыла анапхгара иарбанызаалак ӡбарак рыдыркылом иҟоу апроблемақәа рҭыԥ рықәҵаразы, ҳәа азгәалҭеит Аԥсны аоппозициатә мчрақәа аҩаша, цәыббра 20 рзы имҩаԥыргаз аконференциаҟны ауаажәларратә еиҿкаара "Женщины в политике" ахантәаҩы Ирина Агрԥҳа.
"Аҭагылазаашьа уадаҩуп ҳәа аҳәара акгьы аанагом. Апроблема рацәа еизаны иҟоуп. Урҭ рҭыԥ иқәызҵо ҳәа анапхгараҟны уаҩ дыҟам. Хышықәса ирықәуп аус зуша аиҳабыра ыҟамижьҭеи", — лҳәеит Агрԥҳа.
Апартиа “Амцахара” ахантәаҩы Алхас Кәыҵниа иқәгылараҟны иазгәеиҭеит Аминистрцәа Реилазаара ҿыц аиҿкаараан акаолициатә еиҳабыра аԥҵара рыҽшазырымшәаз.
Афонд "Апра" ахантәаҩы Аслан Бжьаниа иҳәеит аоппозициа аусура ишацҵахо. "Ҳара ҳусура иацҵахоит. Агәра аагоит атәылауаа адгылара шҳарҭо. Ҳусгьы аҵыхәанӡа инаҳагӡоит. Азакәан аус ахьауа аҳәынҭқарра ҳаргылоит", — иҳәеит иара.
Аԥсны аоппозициатә мчқәа рблок аԥҵан ԥхынгәы 14 2015 шықәса рзы.
