АҞӘА, цәыббра 21 – Sputnik, Бадраҟ Аҩӡба. Аҟәа ақалақь акоммуналтә нхамҩа аиҳабы Елена Атепина Sputnik иазеиҭалҳәеит аԥшаӷьи ақәаршҩи ақалақь иарҭаз ааха атәы.
"Аҵыхәтәантәи адыррақәа рыла Ешба имҩаҟны аҵламахә ду амҩа ианаҳалеит. Иара убасгьы Амедицинатә ҵараиурҭа ааигәара икаҳаз аҵла афымцатә цәаҳәақәа ԥнаҵәҵәеит. Инал-иԥа имҩаҟны аҵла адәқьан иақәҳаит. Уажәы ҳмаҵзурақәа урҭ раԥыхра иаҿуп", — лҳәеит Атепина.
Елена Атепина иазгәалҭеит ақалақь Ахадара акоммуналтә маҵзуреи АҶА аусзуҩцәеи аусеицура ишаҿу. Иҟоуп зхыб хнашәаз аҩнқәа.
Атепина лажәақәа рыла аӡқәа хыҵит.
"Аӡы рнылеит авокзал араион иаҵанакуа амҩақәеи Леон имҩеи", — лҳәеит лара.
Елена Атепина иара убасгьы иазгәалҭеит ақәа хкәеит, убри азы шәарҭара ыҟам ҳәа.
