АҞӘА, цәыббра 21 — Sputnik, Бадраҟ Аҩӡба. Апарламент адепутатцәа "Афымцамч азы" азакәан апроект рыдрымкылеит цәыббра 21 азы имҩаԥысыз аилатәараҟны.
"Азакәан иаԥҟара хадақәаны иҟоуп афымцамч ахархәаҩцәеи анашьҭыҩцәеи реизыҟазаашьа. Сара сгәаанагарала азакәан ҟалароуп. Иагьыҟалоит, аха адепутатцәа реиҳараҩык рақәшаҳаҭрала", — иҳәеит азакәан апрект адгалаҩцәа ируаӡәку Гурам Барганџьиа.
Адепутат иажәақәа рыла гәҭакны иҟаз ихымԥадатәиу ареформақәа абри аусхк аҟны рымҩаԥгара акәын.
"Зыӡбахә ҳәаз Аминистрцәа Реилазаара атарифқәа шьақәдыргыло, апроект азы азинмчра Аекономика аминистрра иаманы аҟазаара акәын", — иҳәеит иара.
Азакәан апроект инақәыршәаны иазыԥхьагәаҭан афымцамч ахархәаразы аԥаралхра амҩаԥгараз ахатә фирмақәа раԥҵара.
Иазыԥхьагәаҭан иара убасгьы "Амшынеиқәафымцамч" аԥаралхра мҩаԥнамго ареконструктаризациа аҟаҵара, аԥаралхра иадгыло аиурист еиҿкаарақәа.
