АҞӘА, цәыббра 22– Sputnik, Рада Ажьиԥҳа. Аԥсни Нижни Новгороди рыбжьара наҟ-ааҟгьы еицырзыфеидоу аусеицура ҿиалоит иҳәеит Нижни Новгород имҩаԥысуа V Жәларбжьаратәи абизнес-саммит иалахәу Аԥсны Аԥыза-министр Беслан Барцыц амаҵзура "Время Н" аинтервиу аҭауа.
"Нижни Новгороди Нижегородтәи аобласти аҿиара бзиа зманы иҟоу регионқәоуп. Дареи ҳареи ҳабжьара имаҷым аус зуа апроектқәа. Аԥсни Нижни Новгороди рыбжьара наҟ-ааҟгьы еицырзыфеидоу аусеицура ҿиалоит аеономикатә хра аманы, хырхарҭа рацәала. Хаҭала, ақыҭанхамҩеи атуризми рганахьала", — иҳәеит Барцыц.
"Ҳаиқәшаҳаҭрақәа инарықәыршәаны Аԥсны ара иаанахәахьеит атранспорт хархәаразы автомашьынақәа, амедицинатә хархәагақәа. Ԥхьаҟагьы иаҳҭахуп абри ахырхарҭала аусура ацҵара", — иҳәеит Барцыц.
Беслан Барцыци Нижегородтәи аобласт агубернатор Валери Шанцеви аиԥылара рыман.
Аԥсуа делегациа афорум апленартә еилатәара иалахәын.
"Аԥсуа делегациа асаммит аҳәаақәа ирҭагӡаны имҩаԥысуа ауснагӡатәқәа зегьы ирылахәын. Иазгәаҭатәуп асаммит аиҿкаара ҳаракы шамаз. Ҭабуп ҳәа ахаҳҳәаауеит иҳаҭоу ааԥхьаразы. Араҟа зхы зкыз аиныррақәа хымԥада ԥхьаҟагьы аҿиара роушт. Агәра згоит иахьа имҩаԥысуа зегьы Аԥсны азы хәарҭара рыманы ишыҟало", ҳәа азгәеиҭеит Барцыц.
Аԥсны Аԥыза-министр зхадараҟны дыҟоу Аԥснытәи аделегациа алахәуп Нижни Новгород имҩаԥысуа V Жәларбжьаратәи абизнес-саммит.
Аԥсуа делегациа иалахәуп: Аекономика аминистр Адгәыр Арӡынба, Ахәаахәҭра-ааглыхратә палата аиҳабы Геннади Гагәылиа, Гәдоуҭа араион Ахада Руслан Ладариа.
