АҞӘА, цәыббра 27 – Sputnik. Аҧсны Ахьыҧшымреи Аиааиреи Рымш азгәаҭара иамадоу аусмҩаҧгатәқәа рынагӡара аплан-график кьыԥхьуп атәыла Ахада иофициалтә саит аҟны.
Цәыббрамза 27 рзы Аҧсны, Аҟәа ақалақь ахақәиҭтәра Амш азгәарҭоит.
Цәыббрамза 30 – Аҧсны Аиааиреи Ахьыҧшымреи Рымш ауп.
Цәыббрамза 27: Асааҭ 11:00 рзы – Ахьӡ-Аҧша апарк аҿы ашәҭ шьыҵәрақәа рышьҭаҵара ацеремониа. Асааҭ 16:00 рзы – Амҳаџьыраа рыҧшаҳәаҿы Аколлонада аҿаҧхьа афотоҭыхымҭақәа рцәыргақәҵа.
Асааҭ 17:00 рзы – Аҧсны атәылахьчара Аминистрреи Аҟәа ақалақь Ахадареи рыцхыраарала еиҿкаау Емма Хәаџьааҧҳа лҟынтәи аныҳәатә қәгылара. Аҧацха “Анасыҧ” аҿы Аҟәа ақалақь Ахадара ацхыраарала еиҿкаахоит 150-ҩык рзы аныҳәатә еишәачара.
Цәыббрамза 28: Асааҭ 8:00 — 10:00 рҟынӡа – Атәылахьчара Аминистрра аруаа рпарад арепетициа. Асааҭ 12:00 рзы – Атәылахьчара Аминистрраҿы аныҳәатә еилатәара. Асааҭ 13:00-14:00 рҟынӡа – Атәыла акультуреи аҭоурыхтә-культуратә ҭынхақәа рыхьчара Аминистрра ацхыраарала В. Г. Арӡынба ихьӡ зху Арратә Ахьӡ-Аҧша амузеи аҿы аекспозициа аартра мҩаҧысуеит.
Цәыббрамза 29: Асааҭ 9:00 рзы – Ахақәиҭра Ашҭа аҟынтәи “Аҧсҭазаара амҩа” ҳәа хыс измоу автомашьынақәа рколонна аныҟәара иадҳәалоу аусмҩаҧгатә хацыркхоит. Уи аҳәаақәа ирҭагӡаны қыҭақәа: Аӡҩыбжьа, Аҭара, Тамшь, Кәтол, Џьгьарда иалсуеит. Асааҭ 13:50 рзы – атәыла Анапхгареи автомашьынақәа рколонна алахәылацәеи, С. У. Багаҧшь анышә дахьамадоу аҭыԥаҿы ашәҭ шьыҵәрақәа рышьҭаҵара ацеремониа мҩаҧыргоит. Асааҭ 17:00 рзы – Ақыҭа Бедиа аҿы иарбоу аусмҩаҧгатә алахәылацәа алархәны аминтинг амҩаҧгара.
Цәыббрамза 30: Асааҭ 8:00 рзы – “Аҧсҭазаара амҩа” ҳәа хыс измоу автомашьынақәа рколонна аныҟәара иадҳәалоу аусмҩаҧгатә иацҵахоит: ақыҭақәа Бедиеи Охәыреии рҟынтәи В. Г. Арӡынба Имемориал аҟынӡа ацара.
Асааҭ 9:00 рзы – В.Г.Арӡынба анышә дахьамадоу ашәҭ шьыҵәрақәа рышьҭаҵара. Асааҭ 11:00 рзы – Ахьӡ-Аҧша апарк аҿы ашәҭ шьыҵәрақәа рышьҭаҵара.
Асааҭ 13:00 рзы – Амҳаџьыраа Рыҧшаҳәа аҿы “Ҧсра зқәым аполк” амҩасра. Асааҭ 14:00 рзы – Ахақәиҭра Ашҭаҿы Аҧсны Агимн арҳәареи аныҳәатә парад амҩаҧгареи.
Асааҭ 14:30 рзы – Ахақәиҭра Ашҭаҿы “Ҧсра зқәым аполк” амҩасра. Асааҭ 15:00 рзы – Атәылахьчара Аминистрраҿы аныҳәатә еишәачара. Асааҭ 17:00 рзы – Аҳәынҭқарратә филармониаҿы аконцерттә программа анагӡара.
Асааҭ 19:00 рзы – Амшынтә баҕәаза ахыбра ахыб аҟынтәи аныҳәатә салиут.
