"Ҳара иҳалшеит ҳамчқәа реидкылара. Ҳаруаа зегьы, актәи аҩбатәи абригадақәа рҟны аилацәажәарақәа ыҟан, Владислав Григори-иԥа ҳаизганы дҳацәажәеит. Убри аизара даара аҵак ду амоуп, избанзар убраҟа ихаданы иқәгылан азҵаара, — иҳалшома ҳамчқәа еизганы Аҟәа аҭарцәра? Жәаҳәарада, усҟан акомандирцәа зегьы еицҿакны ирҳәеит Аҟәа аҭарцәра шҳалшо. Аҟәа агаразы ажәылара аиҿкаара аан дҵаны иаҳзықәдыргылеит Гәымсҭа ҵаҟатәи ацҳа ала ақырҭуа ир рҭыԥкәа ирыхцаны иахьынӡаҳалшо аҭыԥ аанкылара", — азгәеиҭеит Аԥсны Афырхаҵа.
Уи иажәақәа рыла, напхгара ззиуаз абаталион аҿаԥхьа дҵас иқәгылан ақырҭқәа рымчқәа дара ахьыҟаз Гәымсҭа ладахьтә ацҳа ашҟа рхьарԥшра акәын.
"Ҳара иаҳдыруан иреиҳау ажәылара хыхьынтә ишцоз, ҳара аплацдарм аанкыланы ҳтәар ҟалон, аха ҳара ԥхьаҟа ҳцон, Учхоз, Гәымсҭа амоссив аҭарцәраан аҷкәынцәа даара агәымшәареи ахаҵареи аадырԥшит", — иҳәеит Леиуан Миқаа.
