АҞӘА, цәыббра 28 – Sputnik, Бадрҟ Аҩӡба. Аԥсны Атәылахьчара аминистр Мираб Кьышьмариа Аҟәа ахақәиҭра амш азы имҩаԥигеит апресс-конференциа. Уи иазгәеиҭеит иара изы аибашьра 2008 шықәса рзы шакәу ианынҵәаз.
"Сара сзы аибашьра нҵәеит 2008 шықәса рзы. Уаанӡа са сзы аибашьра цон, избанзар иааиԥмырҟьаӡакәа ауаа ҭахон Гал араиони Кәыдрытәи аиҩхааҟни", — иҳәеит Кьышьмариа, иагьациҵеит Аҟәа ахақәиҭра дшалахәымыз, избанзар иара аибашьраан Мрагыларатәи афронт ахь дыҟан.
"Аҟәа ахы иақәиҭыртәит ҳәа аимадарала адырра анҳау ҳгәырӷьара ҳәаа амамызт. Ҳамчқәа ҩбахеит", — иҳәеит иара.
Иара убасгьы Кьышьмариа иазгәеиҭеит иара изы реиҳа иуадаҩыз мшны аибашьраан ишыҟалаз лаҭатәи арыцҳара амш.
Аҟәа ақалақь ахақәиҭра инашьҭарххны рхы иақәиҭтәын Очамчыра араион ақыҭақәа, Гал араион ақыҭақәа.
