АҞӘА, цәыббра 29 – Sputnik, Анжелика Бениаԥҳа. Аԥсны жәлар риааира 23 шықәса ахыҵра иазку аныҳәатә еилатәара мҩаԥысит Аԥсны Атәылахьчара аминистрраҟны цәыббра 28 рзы. Атәылахьчара аминистрра аштаб хада афицарцәа, арратә хәҭақәа ркомандирцәа ааит ари аусмҩаԥгатә ахь.
Аԥсны Атәылахьчара аминистр Мираб Кьышьмариа аибашьра аветеранцәа ирыдиныҳәалеит амшныҳәа.
"Ари аныҳәа афырхаҵара иасимволуп. Аиааира амш ҳара ҳзы агәалашәара иамшуп. Аамҭа цацԥхьаӡа еиҳа-еиҳа имаҷхоит иҳавагылоу аибашьцәа. Ҳара иаҳуалуп уи абиԥара ахьӡ-аԥша еиҵагылоу аҿар рызнагара", — иҳәеит Кьышьмариа.
Атәыла Ахада ихаҭыԥуаҩ Витали Габниа аветеранцәеи аррамаҵзурауааи дрыдныҳәалеит атәыла Ахада ихьӡалагьы.
Цәыббра 30 Аԥсны ахы-аҵыхәа иазгәарҭоит Ахьыԥшымра амши Аиааира амши.
