АҞӘА, жьҭаара 4 – Sputnik, Бадраҟ Аҩӡба. Урыстәыла атәылауаҩ Вачаган Петросиан иӷьычра инамаданы имҩаԥго ауснагӡатәқәа ртәы далацәажәеит Аԥсны Аҩныҵҟатәи аусқәа рминистр Аслан Кобахьиа имҩаԥигаз абрифинг аҟны.
"Петросиан иҩызцәа дрыцны Аҟәантәи Очымчырыҟа ихы рханы дцон. Тамшьтәи амилициа рпост ианаҩс ашьҭахь дара ирыхьӡеит амилициатә машьына, иаангыларц дҵаны ирырҭеит. Нас рмашьынахь ииаргеит. Цагьара ақыҭан ацәгьоуцәа еицыз рахьынтә аӡә доурыжьит. Петросиан имашьынеи дара рмашьынеи ацәгьоуцәа ирыблит", — иҳәеит иара.
Аминистр иажәақәа рыла аԥшаарақәа алҵшәа ҟарҵап ҳәа агәыӷра имоуп.
"Агәра шәсыргоит ҳара абри аус уахи-ҽни ҳнапы шалаку", — иҳәеит Кобахьиа.
Вачаган Петросиан дӷьычын цәыббра 28 2016 шықәса рзы.
