Ҩынҩажәа шықәса ирықәуп Лима Павел-иԥҳа аҵаҩцәа аҳасабра длырҵоижьҭеи. Ирацәаҩуп аҳасабра зцымааиуа ахәыҷқәа, аха Лима Павел-иԥҳа иазгәалҭоит арҵаҩ бзиа изы уадаҩрак шалам.
"Уус бзиа иубозароуп, нас зегь уқәманшәалахоит. Иныҭкааны ирзышьҭымкааргьы ахы-аҵыхәа еилдыргартә еиԥш идурҵар алшоит", — лҳәоит лара.
Лима Павел-иԥҳа убриаҟара лхәыҷқәа рыԥсҭазаара дагәыланахалалоит, лхатә ҭаацәа рзы лаамҭа лзымхо аҟынӡа.
Лима Аршԥҳа лыҿцәажәара шәазыӡырҩыр ҟалоит абра
"Зны-зынла схәыҷқәа сыцәгәаауеит. Атәымхәыҷқәа еиҳа игәцарабкуеит рҳәалоит. Аха ахәыҷқәа гәцароумкыр уусгьы уқәманшәалахом", — лҳәоит лара.
Лима Павел-иԥҳа раԥхьатәи лоушьҭымҭацәа ашкол иалгеит 1990 шықәса рзы.
"Усҟан атәылаҟны амилаҭ-хақәиҭратә қәгыларақәа мҩаԥысуан. Соушьҭымҭацәа шамахамзар уи иалахәын. Издыруан џьара шәарҭарак ҟалар аганахь ишымгылоз", ҳәа азгәалҭоит Лима Аршԥҳа.
Лима Павел-иԥҳа лкласс аҟынтәи дҭахоит лҵаҩцәа иреиӷьыз Беслан Гонџьуа. Беслан икласс ашкол ралгара ԥшьышықәса шагыз лҵаҩцәа адҵа рылҭеит "Исылшоз Аԥсназы иҟасҵарц аџьашьахә-лаба сымазар".
"Аибашьраан сыҩны блит, аха иаанхеит сқьаадқәа зыҩназ ауада. Еиқәхеит сҵаҩцәа ранҵамҭақәа. Иаанхеит Беслан иҩымҭа, уаҟа иара иҩуан: ахаан аибашьра ҟамларц, ҩыџьа аԥацәеи ҩыџьа аԥҳацәеи сымазарц сҭахуп ҳәа.
Асеиԥш иҩуан 1986 шықәса рзы. Беслан дҭахеит цәыббра 19 рзы Гәымсҭа", ҳәа еиҭалҳәоит Лима Павел-иԥҳа.
Афырхаҵа иҩызцәеи ирҵаҩи ргәалашәараҿ ахааназгьы дыҟоуп.
