АҞӘА, жьҭаара 7 – Sputnik, Роберт Џьопуа. 22 аборигентә ажь сортқәа еиҭаҳан Аҟәа араион аҟны. Урҭ уажәы аҽаҩра аарышьҭуа иалагеит, иҳәеит аилахәыра "Вина и воды Абхазии" аҩыҟаҵаҩ Валери Аҩӡба.
"Ҷыдалатәи аекспедициа ақыҭақәа ирылаланы еизыргон аԥсуажьқәа ржәытәсортқәа. Еизаагеит 22 хкы ажь шкәакәеи ажь еиқәаҵәақәеи", — иҳәеит Аҩӡба.
Урҭ асортқәа еиҭашьақәыргылан Ҟрымтәи аҩыҟаҵареи аӡахәааӡареи Ринститут "Магарач"аҟны.
Адгьылбжьаха аҟынтәи Аԥсныҟа иааган хәнызқь шьаҭа аӡахәа. Урҭ Аҟәа араион аҟны еиҭаҳан. Аӡахәашьаҭақәа зегьы ԥхасҭа рмоукәа иаднакылеит.
Валери Аҩӡба иҿцәажәаар шәазыӡырҩыр ҟалоит абра
"Даара ҳақәгәыӷуеит асортқәа "Качыч", "Аӷбажь", "Амлаху", "Ачыкажь" уҳәа еиҭашьақәгылоит аҽаҩра бзиа роуртә ҳәа", — иҳәеит аҩыҟаҵаҩ.
Sputnik аинтервиу аҭо Валери Аҩӡба иазгәеиҭеит ареспубликаҟны ирылаҵәоу "Изабелла" акәзар арахь шәышықәсаҟа раԥхьоуп ианаанагаз ҳәа.
