АҞӘА, жьҭаара 11 – Sputnik, Бадраҟ Аҩӡба. Абизнес ҿыц знапы алазкуа ашәахтәқәа рхыхтәуп аамҭақәак рзы акәзаргьы, иҳәеит Рауль Ҳаџьымба 2016 шықәсазтәи абиуџьет анагӡашьеи 2017 шықәсатәи абиуџьет аиҿкаашьеи ирызкыз аилацәажәараҟны.
"Уи иалнаршоит ареспублика уаҵәтәи амш еиҭанакыр. Афинанслагалақәа еиҳахоит. Зегь иашаны имҩаԥаагарц азы азҵаарақәа ныҭкааны иҭҵаатәуп", — иҳәеит Ҳаџьымба.
Атәыла Ахада иазгәеиҭеит аекономикатә процесс алахәылацәа рхыԥхьаӡара еҳа-еҳа ишеизҳауа, аха аус зуа рхыԥхьаӡара шеиҵахо.
"Ус изыҟоу ашәахтәқәа рҽырцәыхьчаразоуп. Ҽаантәи абиуџьет знапы алаку зегьы сшәыҳәоит арҭ аҭагылазаашьақәа азыԥхьагәашәҭарц", — иҳәеит Ахада.
Аекономикатә проблемақәа рыӡбараан ахы иархәатәуп аҳәынҭқарра алшарақәа зегьы, ҳәа азгәеиҭеит иара.
Рауль Ҳаџьымба дазааҭгылеит акоррупциатә схемақәа, иҩбатәу абухгалтериа уҳәа аекономика аҿиара иаԥырхагоу ацәырҵрақәа ишырҿагылалатәу.
