АҞӘА, жьҭаара 12 – Sputnik, Бадраҟ Аҩӡба. Аԥсны Аԥыза-министр ихаҭыԥуаҩ Беслан Ешба имҩаԥигеит 2016 шықәса нанҳәа 3-4 рзы иҟалаз аӡхыҵра ахҟьа-ԥҟьақәа раԥыхразы акомиссиа аилатәара. Аилатәараҟны Аԥсны Аԥыза-министр ихаҭыԥуаҩ Беслан Ешба иазгәеиҭеит аԥхасҭаԥса зегьы ишрызшәахо иара убри аамҭазы ахылаԥшра ӷәӷәа шымҩаԥырго.
"Дарбанызаалак аӡәгьы дгәыгәҭажьны дҟамлароуп", — иҳәеит иара.
Аԥхасҭаԥса ахышәа-ҵышәа ҷыда-ҷыдала ишьақәыргылахоит, дасу иоуз аԥхасҭа ахәоуп изшәахо.
"Акомиссиа алахәылацәа арзаҳалқәа зегьы ҭырҵаауеит, нас аԥарашәара иалагоит. Аҟәа ақалақь аҟны аиҭашьақәыргыларатә усурақәа х-хәҭакны иаҳшоит. Раԥхьа напы алаҳкуеит аӡышьҭрақәа ррыцқьара", — иҳәеит Ешба.
Аԥаразоужьра мҩаԥысуеит атәыла Ахада ифонд аҟынтәи.
Беслан Ешба адҵа ҟаиҵеит амшцәгьақәа раан ихыҵны ауааԥсыра рынхарҭақәа ирыҵало Аҟәа аӡиасқәа хәба рӡышьҭрақәа дрыцқьарц.
Нанҳәа 3 — 4 рзы Аҟәа амшцәгьа иахҟьаны аӡиас маҷқәа жәпакы рыҭрақәа ирҭыҵны ақалақь иалалеит. Еиԥҟьеит ақалақь фымцалеи ӡылеи аиқәыршәара.
Асеиԥш аԥсабаратә рыцҳара ҟалахьеит изныкымкәа. Уи иахҟьаны ирацәаҩуп аԥхасҭа зауз ауааԥсыра.
