АҞӘА, жьҭаара 12 – Sputnik, Рада Ажьиԥҳа. Афильм "Спасибо деду за Победу" аперсонажцәа зегьы ахәаԥшҩы ихамшҭуа иҟалоит, иҳәеит ҳкорреспондент диҿцәажәо арежиссиор Ҭимур Ҭаниа.
"Афильм аҭыхра иалахәуп аԥсуа актиорцәа Кьасоу Ҳагба, Софа Агәмаа, Адгур Малиа, КВН акоманда "Нарты из Абхазии" аилазаара зегьы. Афильм аперсонажцәа ахәаԥшцәа ргәалашәараҟны иаанхоит ҳәа агәра згоит. Аҭыхрақәа ирыцхраауеит акиностудиа RSS Production. Жьҭаара 6 рзы раԥхьатәи аҭыхрақәа мҩаԥаагеит Ԥсоутәи аҳәааҟны. Уахьынтәи ҳцеит Гәыԥҟа. Уаҟоуп иахьыҟоу афырхаҵа хада Џьансыхә иҩны. Аԥсны аҭыхрақәа хҳаркәшар Москваҟа ҳаиасуеит", — иҳәеит Ҭаниа.
"Афильм ҩ-блокк рыла ишьақәгылоуп – иахьатәи аамҭеи абду игәалашәарақәеи рыла. Ароль хада неигӡоит Алексеи Онежин, иара убасгьы Егор Бероеви Кьасоу Ҳагбеи рыдагьы актиоцәа ҿарацәа Алмас Џьениа, Леон Ақаҩба, Лаша Ҭаниа инарыгӡоит арольқәа", — иҳәеит Ҭимур Ҭаниа.
Афильм апрезентациа мҩаԥгахоит 2017 шықәса лаҵарамзазы, Москва.
