АҞӘА, жьҭаара 13 – Sputnik, Бадри Есиава. Аԥсны Ахада идикылеит агроааглыхратә цәыргақәҵа "Золотая осень 2016" аҟны аиааира згаз, ирыдиныҳәалеит раԥхьахә.
"Ишәыдысныҳәалоит ижәгаз аиааира. Уи уаҩ дамыргәырӷьо иҟаӡам", — иҳәеит иара.
Урыстәыла иҟоу Аԥсны ахәаахәҭратә хаҭарнак Олег Барцыц атәыла Ахада ииҭеит ацәыргақәҵаҟны ироуз аҳамҭа. Барцыц иазгәеиҭеит хаҭала иареи Аԥсны ахаҭарнакцәеи агәадура ду шырнаҭаз атәыла ахьӡала ацәыргақәҵаҟны аҟазаара.
"Хәышықәсоуп ҳара жәларбжьаратәи агроааглыхратә цәыргақәҵа ҳҽалаҳархәуеижьҭеи. Еснагь аԥхьахәқәа ҳанаршьоит", — иҳәеит Барцыц.
Олег Барцыц иҳәеит аԥснытәи аалыҵ еиуеиԥшым аԥхьахәқәа ахьанашьоу адагьы зекологиа еиҳа ицқьоу аалыҵ ҳәа ишалкаау.
XVIII урыстәылатәи агроааглыхратә цәыргақәҵа "Золотая осень-2016" мҩаԥысуан жьҭаара 5-8 рзы.
