АҞӘА, жьҭаара 14 – Sputnik, Бадраҟ Аҩӡба. Аԥсны абызшәақәа зегьы аҭыԥ рымазар рылшоит, аха аҳәынҭқарра иныҟәнаго, уи зхылаԥшуа ҩ-бызшәак роуп, акы аҳәынҭқарратә аԥсуа бызшәа, егьи аурысшәа, иҳәеит абызшәадырҩы Валери Кәарҷиа Ауаажәларратә палата аилатәара аҟны, ахәаша жьҭаара 14 рзы.
"Иахьа Аԥсны инхо дарбанзаалакгьы, ҩ-бызшәак изымдыркәа, аминистрра ахьгьы дзымнеиуа иҟазар ауп, адепутатра ахьгьы имҩа аркызар ауп ҳзакәан излаҳәо ала. Ак удыруа, ак узымдыруа акәымкәа, еицаҳдыруазар ауп. Аурысшәа зегьы еицаҳдыруеит, еицаҳзымдыруа ҳбызшәа ауп", — азгәеиҭеит уи.
Валери Кәарҷиа иҳәеит Аԥсны Аҳәынҭқарратә бызшәа азакәан анагӡараҿы ауадаҩрақәа маҷымкәа ишыҟоу.
"Аԥсны Аҳәынҭқарратә закәан ахәҭаҷқәа зегьы аусура иалагеи 2015 шықәса инаркны. Ҳаизарақәа зегьы аҷҷаҳәа аԥсышәала имҩаԥго, ҳапротоколқәа зегьы аԥсышәала иҳаҩуа ҳалагар акәын уи аахыс. Аха иахьа зегьы ишаҳҭаху иҟаӡам, уи зыхҟьо ҳаиҿымкаара, аполитикатә ҭагылазаашьа, иара убас аекономикатә ҭагылазаашьа. Аха ҳара харџь бааԥсык ҟамҵакәа, иҟаҳҵаша аусқәа ыҟоуп", — инаҵшьны иазгәеиҭеит иара.
Абызшәа аԥсҭазаараҿы ахархәара амамзар, уи ԥсуеит, аха азакәан ишаҳәо ала ҳныҟәар аҭагылазаашьа акыр еиӷьхоит, иҳәеит аҵарауаҩ.
Валери Кәарҷиа излазгәеиҭаз ала, Аԥсны аиҳабыра апрезидент аԥхьа днаргыланы аԥсуа бызшәа иахаҵгылоит.
"Ишыжәбо еиԥш апрезидент аԥсышәала дцәажәоит, аизарақәа ҳбызшәала иааиртуеит, нас еилаԥсаны дцәажәозаргьы, ихадароу аԥсшәа дахаҵгыолит", — иҳәеит Кәарҷиа.
Уи иазгәеиҭеит, апрезидент ихала ари азҵаара аӡбара шилымшо, аҳәынҭқарратә усбарҭақәа зегьы аԥсышәахь ииасыр шакәу.
