АҞӘА, жьҭаара 19– Sputnik, Бадраҟ Аҩӡба. Автомашьынамҩа Хиацха-Ԥчара аиҭашьақәыргыларазы аремонттә усурақәа хыркәшоуп, иҳәеит галл араион Ахада Ҭимур Надараиа, имҩаԥигоз апресс-конференциаҟны.
"Акаҭранмҩа аҭбаара ф-метрак иҟоуп. Аусурақәа ирыхҭынҵоуп 150 миллион мааҭ аԥара. Амҩа ахышәа-ҵышәа иартәоит 32 километра. Арахьала аныҟәара иалнаршоит иаарласны аҭыԥ ахь анеира", — иҳәеит иара.
Аусурақәа мҩаԥгоуп Урыстәылатәи Афедерациа иҟанаҵо афинанстә цхыраарала.
Ҭимур Надараиа иажәақәа рыла Гал ақалақь аҟны аӡымҩангагақәа реиҭашьақәыргылара иаҿуп.
"Аӡымҩангагақәа реиҭашьақәыргылара ҳаҿуп. Апроект иақәхарџьуп 8,5 миллион мааҭ аԥара. Урҭ аԥарақәагьы Урыстәылатәи афинанстә цхыраара иахәҭакуп. Аусурақәа актәи рыхәҭа хыркәшоуп. Аҩбатәи рыхәҭа иақәхарџьхоит 32 миллион мааҭ аԥара", — иҳәеит Гал араион Ахада.
Уи адагьы иара иажәақәа рыла аҩнеихагылақәа рподвалқәа рырбаразы аусурақәа ирҿуп. Урҭ аусурақәа араион абиуџьет аҟынтәи ауп аԥара шырзоурыжьуа.
Надараиа далацәажәеит иара убасгьы Галтәи ателехәаԥшразы амыругақәа аархәараны ишыҟоу. Ателехәаԥшра аусура хацнаркуеит ҽааны, иҳәеит Надараиа.
