АҞӘА, жьҭаара 21 – Sputnik, Бадри Есиава. Жәа-миллион мааҭ иркуа апластик иалху атара аҟаҵаразы амыругақәа Ақыҭанхамҩа аминистрра иаахәаны 15 шықәса арендла ҳәа аилахәыра "София" ианаҭеит. Абри азы ақәҵара еицҿакрыла ирыдыркылеит Аминистрцәа Реилазаара аилатәараҟны.
"Асеиԥш ҟаҳҵеит избанзар аекспорт ахь иаҳашьҭуа ҳаалыҵ амҿтәы мамзаргьы ақьаадтә тарала еиҿаҳкаауеит. Убри инадҳәаланы иҳаӡбеит апластика иалху атара аҭыԥаҿ аҭыжьразы арендла аилахәыра "София" иаҳҭарц", — иҳәеит Аԥсны Ақыҭанхамҩа аминистр ихаҭыԥуаҩ Ашот Минасиан.
Аԥсны Аԥыза-министр Беслан Барцыц ишьақәирӷәӷәеит аԥснытәи ақыҭанхамҩатә аалыҵ ҳаамҭа иақәшәо ишаҳзеиҿымкаауа.
"Ииашаны ҳааглыхыҩцәа ҳаамҭазтәи адизаин змоу атара рҭахны иҟан. Аилахәыра "София" амыруга шаархәаз еиԥш аалыҵ аҭыжьра ишалаго азы хәдықәҵара ҟарҵеит", — иҳәеит Барцыц.
Аилатәараҟны ирыхәаԥшын 10 инареиҳаны зҵаара.
