АҞӘА, жьҭаара 24 – Sputnik, Владимир Бегунов. Европатәи аексперттә гәыԥ аусура иаҿуп Гәдоуҭа араион аҟны. Абри атәы ҳкорреспондент изеиҭеиҳәеит Акультуреи аҭоурых-культуратә баҟақәа рыхьчареи рминистр лхаҭыԥуаҩ Баҭал Кобахьиа.
Кобахьиа иажәақәа рыла Аԥсны абаҟақәа Иунеско асиа алаҵара ԥхьаҟатәи усуп, аха абри аганахьала аусурақәа мҩаԥысуеит.
"Британиа Ду, Хорватиа, Македониа, Босниеи Герцеговиниеи рҟынтәи азанааҭуаа ааны иҟоуп. Ҳара аиҳарак аинтерес ҳамоуп Иугославиа аԥышәа. Аибашьра ашьҭахь урҭ ирылшеит ркультуратә обиектқәа реиҭашьақәыргылара", — иҳәеит Баҭал Кобахьиа.
Уажәазы Европатәи аексперттә гәыԥ аусура иаҿп Гәдоуҭа араион аҟны. Иарбанызаалак аобиект азы ишьақәыргылахоит аҭаҩратә шәҟәыбӷьыц.
Аԥсуа обиектқәа Иунеско асиа ранҵаразы СССР аамҭақәа рызгьы аҽышәарақәа ҟарҵахьан. Уаанӡа Баҭал Кобахьиа Sputnik иеиҳәахьан шәкы рҟынӡа обиект шалрыԥшаахьоу. Урҭ рҟынтәи акы акәзаргьы асиа ианшәалар даара ибзиан ҳәа. Ари азҵаара иара убасгьы иалацәажәахьеит Женеватәи аиҿцәажәарақәа рҟны.
