Гәдоуҭа, абҵара 2 – Sputnik, Бадри Есиава. Аԥсны Ахада Руаль Ҳаџьымба Гәдоуҭа араион ахадареи ауаажәларреи алархәны аилацәажәара мҩаԥигеит аҩаша, абҵарамза 2 рзы, абри атәы ааицҳауеит Sputnik акорреспондент аҭыԥ аҟынтәи.
Гәдоуҭа араион ахада Руслан Ладариа иҳәеит, 2016 шықәсазы жәамз рыҩныҵҟа илырхыз ашәахтәқәа 303 миллион мааҭ шартәаз, аплан инақәыршәаны 200 миллион ракәын иҟаз ҳәа.
"Егьи ашықәс иаҿырԥшны иаҳҳәозар, сынтәа 24 миллион мааҭ рыла илырхыз ашәахтәқәа еиҳахеит", — иҳәеит Ладариа.
Араион ахада иажәақәа рыла, аҵыхәтәантәи ашықәсқәа рзы Гәдоуҭа еиҳахеит атурсттә обиектқәа, Афон Ҿыцтәи аҳаԥи Риҵатәи амилаҭтә парки араион иазоурыжьуа аԥарақәа уи аҿиара иацхраауеит.
Иара убас Ладариа иациҵеит, 2017 шықәсазы аҵаратә усбарҭақәак шьаҭанкыла рырҽеира ргәы ишҭоу, 2018 шықәсазы гәдоуҭатәи Аԥсны жәлар рџьынџьтәылатә еибашьра амузеи аҿгьы ишхыркәшахо аргыларақәа.
