АҞӘА, абҵара 3 — Sputnik. Аахыҵ Уаԥстәыла Апрезидент Леонид Тибилов апартиақәеи аиҿкаарақәеи рхаҭарнакцәеи, аҵарауааи дрыҿцәажәараны дыҟоуп ареспублика аҭоурых хьӡы – Аланиа азырхынҳәразы. Абри атәы аалыцҳаит атәыла Ахада ипресс-маӡаныҟәгаҩ Гана Иановскаиа.
Атәыла ахьӡ аԥсахра Тибилов далацәажәеит 2015 шықәса рзы. Иановскаиа лажәақәа рыла абри азҵаара аганахьала уиаахыс имҩаԥган иакымкәа иҩбамкәа аилацәажәарақәа.
"Аҵарауааи, аекспертцәеи, аполитикцәеи ргәаанагарақәа рҳәон, еилацәажәон. Ари аус уажәгьы имҩаԥысуеит", — лҳәеит лара.
Иановскаиа иара убасгьы иазгәалҭеит асоциалтә ҳақәа рҟынгьы абри азҵаара инарҭбааны алацәажәара шымҩаԥысуа.
"Аиҳараҩык ажәадгала ҟарҵоит – ареспублика ажәытә хьӡы архынҳәразы", лҳәоит Иановскаиа.
Леонид Тибилов 2015 шықәса рзы иусбарҭа аусзуҩцәа рнапы ианиҵеит ареспублика Аахыҵ Уаԥстәыла-Аланиа ахьӡҵара азҵаара аус адыруларц.
