АҞӘА, абҵара 3— Sputnik. Урыстәыла Аԥсназы стратегиатә ҩызаны, аҭынчреи ашәарҭадареи алзыршо тәыланы иҟоуп иҳәеит Аԥсны Адәныҟатәи аусқәа рминистр Даур Ақаҩба Москва усутә визитла иҟазаараан.
"Аԥсны ахә ҳаракны иршьоит ҳаиԥылара. Урыстәыла адгылара иалнаршеит Аԥсны шьаҿа-шьаҿала ԥхьаҟа аиҭаҵра, аҿаԥхьа иқәгылоу асоциал-економикатә зҵаарақәа рыӡбара. Ҳтәылақәа рыбжьара аинырра иарҭбаауеит еиуеиԥшым аусхкқәа рҟны аҳәынҭқаррабжьаратә усеицура", — иҳәеит Ақаҩба.
Даур Ақаҩба иара убасгьы иазгәеиҭеит атәылақәа рыҩба рнапы зҵарыҩхьоу адокументқәа ареспублика адәныҟаполитикатә курс азы аԥыжәара шрымоу.
"Дара иалдыршоит Аԥсны жәларбжьаратәи аиҿкаарақәа рылахәра. Иазгәасҭар сҭахуп Урыстәыла Аԥсназы стратегиатә ҩызаны, аҭынчреи ашәарҭадареи алзыршо тәыланы ишыҟоу", — иҳәеит Адәныҟатәи аусқәа рминистр.
Аԥсны Адәныҟатәи аусқәа рминистр Даур Ақаҩба зхадараҟны дыҟоу Аԥсны аделегациа Москва усутә визитла иҟоуп.
