АҞӘА, абҵара 4 – Sputnik, Владимир Бегунов. Краснодартәи ашьапылампылтә команда "Академия ФК "Краснодар" актәи аҭыԥ ааннакылеит ақәыԥшцәа рыбжьара имҩаԥысуаз аицлабра "Осенний кубок Динамо" аҿы. Абри атәы иҳәеит аицлабрақәа рарбитр хада Алексеи Иваненко.
Иваненко иажәақәа рыла, аиааира згоз иеилкаара уадаҩӡамызт ахәмаррақәа зегьы хыркәшахаанӡагьы.
Аҩбатәи аҭыԥ ааннакылеит аҟәатәи "Нарҭ", ахԥатәи еиҭах иагеит аҟәатәи акоманда "ДЮСШ".
"Академия ФК "Краснодар" даара иӷәӷәоуп, аԥснытәии аахыҵ уаԥстәылатәи ашьапылампыласыҩцәа рзы ари ԥышәа бзиоуп", — иҳәеит аицлабрақәа рарбитр хада.
Иреиӷьу амбахьчаҩны дыԥхьаӡоуп Алан Икоев цхинвалтәи «Спартак» аҟынтә, иреиӷьу ахәмарыҩны дыԥхьаӡоуп Егор Тетерлев "Академия ФК "Краснодар" аҟынтә.
