АҞӘА, абҵара 4 – Sputnik, Бадраҟ Аҩӡба. Аминистрцәа Реилазаара еицҿакрыла рыбжьы рҭиит Ҭали Џьапуаԥҳа Аԥснытәи Аҳәынҭқарратә телерадиоеилахәыра адиректор хадас лыҟаҵаразы.
Аԥсны Аԥыза-министр Беслан Барцыц ателерадиоеилахәыра анапхгаҩ ҿыц Аминистрцәа Реилазаара алахәылацәа ддырдыруа иҳәеит: "Ишыжәдыруа еиԥш Аԥснытәи ателерадиоеилахәыра адиректор хада игәамбзиара иахҟьаны иусура аанижьыр акәхеит. Ишәыдаагало акандидатура зегьы ибзианы дыжәдыруеит. Ҭали Џьапуаԥҳа иаҳзаанлыжьит аибашьра иазку хәы змам архив. Ҳара ҳаигәыӷуеит лԥышәеи лыпрофессионализми ахархәара шрылҭо", — иҳәеит Барцыц.
Ҭали Џьапуаԥҳа диит 1956 шықәса абҵара 29 рзы Очамчыра араион Ҷлоу ақыҭан.
1977 шықәса рзы далгеит А.М. Горки ихьӡ зху Аҟәатәи аҳәынҭқарратә рҵаҩратә институт, афилологиатә факультет.
1978 — 1979 шш. – Ҷлоутәи абжьаратә школ аԥсуа бызшәеи алитературеи рырҵаҩы.
1987 — 1990 шш. — ААУ аԥсуа литература акафедра арҵаҩы.
1990 шықәсазы Дырмит Гәлиа ихьӡ зху агуманитартә ҭҵаарақәа Аԥснытәи ринститут аҭҵаарадырратә усзуҩ.
1996 — 2002 ш. – Аԥсны Жәлар Реизара – Апарламент адепутат.
2001 — 2003 шш. – Аԥсуа бызшәа аҿиараз Аҳәынҭқарратә Фонд анапхгаҩы.
2003 – 2004 шш. – Аԥсны Аҳәынҭқарра Аҵара аминистр.
Ажьырныҳәа 19 2016 шықәса инаркны Аԥсны Ахада аҳәынҭқарратә бызшәа аполитика азҵаарақәа рзы ицхырааҩыс дыҟан.
Аԥсны жәлар Рџьынџьтәылатә еибашьра алахәыла, Аԥсны Афырхаҵа.
