АҞӘА, абҵара 7 – Sputnik, Рада Ажьиԥҳа. Ахәыҷтәы коллектив "Аҷандара" Жәларбжьаратәи ахәыҷтәы ҟазара аконкурс "ART Arena" аҟны аԥыжәара агеит, ианашьахеит Гран-при. Абри атәы ҳзааицҳаит Аҷандаратәи абжьаратә школ адиректор Валери Аҩӡба.
"Ҳакәашаратә ансамбль ҩынтәуп афестиваль аҽаланархәуеижьҭеи. Рыҩнтә раангьы Гран-при аанагоит. Даара агәахәара ҳарҭоит ҳхьыбҿар. Ари ҳара ҳадагьы Аԥсны зегь азы игәышьҭыхроуп", — иҳәоит Валери Аҩӡба.
Ахареограф Адгәыр Кәарҷелиа иҳәоит ансамбль ишынанагӡаз акәашарақәа ҩба.
Ахәыҷқәа Шәачаҟа рцаразы аԥара рзоунажьит Гәдоуҭа араион Ахадара. Ансамбль еиҿкаан быжьшықәса раԥхьа ақыҭа Ахада Витали Џьениа иаԥшьгарала.
