АҞӘА, абҵара 14 – Sputnik, Роберт Џьапуа. Адиабет ауаҩы имоу имаму аилкааразы хәыда-ԥсадатәи акциа мҩаԥысит иахьа, абҵара 14 рзы ААР аполиклиника аҿы, абри атәы Sputnik акорреспондент иалҳәеит Аҩнуцҟатәи Аусқәа рминистрра амедицинатә усбарҭа аиҳабы Русудан Габлаиаԥҳа.
"Изҭахыз зегьы раԥхьа аҭаҩрҭаҿы инеиуан, анаҩс еиуеиԥшым агәаҭарақәа ирхысуан", — лҳәеит Русудан Габлаиаԥҳа.
Аҩнуцҟатәи Аусқәа рминистрра амедицинатә усбарҭа аиҳабы лажәақәа рыла, ачымазара раԥхьатәи асимптомқәа иреиуоуп: ааԥсара, ашабара, аполиуриа.
Иара убас лара иацылҵеит ҳреспублика аҿы инхо ажәлар рҟынтә ирацәоуп ари ачымазара змоу, иҟоуп уи атәы здыру реиԥш иззымдыруагьы.
Акциа зхы алазырхәыз ауаа рхыԥхьаӡара маҷын, уи зыхҟьаз ианаамҭаз аинформациа ажәлар иахьырмоуз ауп, лҳәеит Габлаиаԥҳа.
