Аԥсны Диоскуриа иадҳәалоу амонетақәа ҳамаӡамызт. Уажәы ааигәа Санкт-Петербург аколлекционерцәа рҟынтәи иааҳхәеит. Еџье Ҭраԥшьԥҳа амузеиқәа реиҿкаашьа, рырхиашьа дахәаԥшырц, иҭылҵаарц дызҭааз Санкт-Петербургтәи аетнографиатә музеии Ермитажи рҿы лара илбеит уаҟа Аԥснынтәи ирацәаны аматериалқәа шыҟоу.
"Сара Санкт-Петербургҟа сцеит Гәдоуҭатәи аетнографиатә музеи аиҳабы Баҭал Гәынба ибзоурала. Сара хықәкыс исыман Ермитаж аҿы Аԥснынтәи уа иҟоу аматериалқәа рбара. Насгьы аетнографиатә музеи аҭаара. Санкт-Петербург аетнографиатә музеи аҿгьы Аԥснынтәи аматериалқәа рацәоуп. Ермитаж алабораториаҿы археологиатә материалқәа шырыхьчо аҭҵаара акәын сара схықәкы хада. Урҭ аматериалқәа шыдрыцқьо ибзианы еилыскаар сҭахын", — лҳәеит Еџье Ҭраԥшьԥҳа.
Урҭ ркопиақәа ҭыхны арахь аагареи амузеиқәа ииашаны реиқәыршәареи рзы лара дырԥылеит, драцәажәеит аҵарауаа. Илҭахуп имаҷны ус еиԥш иҟоу амузеи ара Аԥсны еиҿкаазарц.
