АҞӘА, абҵара 15 – Sputnik, Бадри Есиава. Аԥсны Аекономика аминистрреи Урыстәылатәи Афедерациа Аекономикатә ҿиара аминистрреи еицымҩаԥырго аекономикатә форум аатит Аҟәа, абҵара 15 рзы ҳәа аҭыԥ аҟынтәи иааицҳауеит ҳкорреспондент.
Аԥсны Аԥыза-министр Беслан Барцыци ЗҲәА "Эко-центр менеджмент групп" адиректор хадеи рнапы аҵарҩит Аԥсны Аҳәынҭқарра аҵакырадгьыл аҟны ааглыхратәии ахархәаратәии црыҵқәа аус рыдулара аусхк аҟны аусеицуразы аиқәшаҳаҭра. Аусутә форум аҟны иара убасгьы аԥснытәии урыстәылатәии аилахәырақәа рыбжьара анапы рыҵаҩын аиқәшаҳаҭрақәа, аилаӡарақәа.
"Аусутә форум аҳәаақәа ирҭагӡаны имҩаԥысраны иҟоуп астол гьыжьқәа ҩба: атуризми ақыҭанхамҩеи ртемақәа ирызкны", — иҳәеит Афорум аҟны адныҳәаларатә жәахә ҟазҵаз Аԥсны Ахада.
Афорум амҩаԥысраан ирылацәажәараны иҟоуп атуризм, ақыҭанхамҩа, аинвестициақәа атәылахь рааԥхьара, анаплакқәа рырҿиара уҳәа азҵаарақәа жәпакы
