АҞӘА, абҵара 15 – Sputnik, Бадри Есиава. Гонконгтәи агрипп иаҿагыло авакцинаҟаҵара мҩаԥгахоит мызкы иназынаԥшуа ҳәа ҳкорреспондент иалҳәеит Аҟәатәи ахәыҷтәы поликлиника аҳақьым хада Ада Абыхәԥҳа. Ахархәара аиуеит апрепарат "Гриппол+", лҳәеит Ада Абыхәԥҳа.
"Агәабзиарахьчара аминистрра иҳанаҭеит авакцина "Гриппол +". Иара аилазаара иалоуп сынтәа ҳаззыԥшу агрипп антиген. Абри амчыбжь инаркны массала авакцина аҟаҵара ҳалагоит ашколқәеи ашколқәраҟынӡатәи аусҳәарҭақәа рҟны. Иҟалоит изҭаху ҳполиклиникахь дадҵааларгьы", — лҳәеит аҳақьым хада.
Ада Абыхәԥҳа илҳәеит ахәыҷқәа ҩынтә агәлаҵа шырзыҟарҵо, адуқәа – знык.
Аҳақьым лажәақәа рыла, зегьы агәлаҵа ҟарҵароуп. Агрипп шәарҭоуп ахылҿиаарақәа рыла.
"Апрепарат "Гриппол+" акәтаӷь ацил ахьамоу иахҟьаны ацил азы аллергиа змоу ирырҭом", — лҳәоит Абыхәԥҳа.
Амассатә вакцинациа мҩаԥысуеит ԥхынҷкәын абжаранӡа.
