АҞӘА, абҵара 21 – Sputnik, Бадраҟ Аҩӡба. Аԥсны агрофирмақәеи ақыҭанхамҩатә наплакқәеи рнапхгаҩцәа сынтәа ацитрустә шәырқәа рыдкыларҭа ҭыԥқәа ахьыҟамло уадаҩрак аланы ирбом, ҳәа ҳкорреспондент изеиҭеиҳәеит аҳәынҭнаплакы "Гагрыԥшь" адиректор Иури Хышба.
Иара иазгәеиҭеит инаплакы урҭ адкыларҭақәа уаанӡагьы аус шрыцимуаз.
"Адкыларҭатә ҭыԥқәа зҭахны иҟоу Очамчыра, Аҟәа, Гәылрыԥшь рраионқәа рҿоуп, избанзар урҭ аҳәаа иацәыхароуп", — иҳәеит Хышба.
Гәылрыԥшьтәи анаплакы "Софиа" аиҳабы Вахтанг Ԥачлиагьы иҳәеит рнаплакы адкыларҭатә ҭыԥқәа рахь шамахамзар аалыҵ шнарымгоз.
"Ҳара иаразнакы аахәаҩцәа ираҳҭоит ҳаалыҵ, аха адкыларҭатә ҭыԥқәа рҟны хәԥсала ҳаиқәшәозар, урҭгьы израҳамҭоз…", — иҳәоит иара.
"Абхазагростандарт" адиректор хада Сеиран Ичмелиан иазгәеиҭеит зхадараҿы дгылоу анаплакы аалыҵ аҭира ахала ишымҩаԥнаго.
Ақыҭанхамҩа аминистрра адыррақәа рыла сынтәа иазыԥхьагәаҭоуп 29 000 тонна аҽаҩра ҭагалахоит ҳәа.
