АҞӘА, абҵара 22 — Sputnik, Анжелика Бениаԥҳа. Ромеои Џьулеттеи рыбзиабара аҭоурых аԥсуа хәаԥшыҩцәа ирбеит аурыс драматә театр асценаҟны.
Аклассикатә балет атеатр атруппа инанагӡаз абалет изныкымкәа ахәаԥшыҩцәа рыгәқәа хнаххьеит
Аԥсны Акультура аминистр Ельвира Арсалиаԥҳа иазгәалҭеит аурыс драматә театр аҿаԥхьа ишықәнаргылаз иуадаҩу аха аинтерес змоу аус – ахатәы спектакльқәа рыдагьы абалет аума арҿиаратә хәылԥазқәа роума аԥснытәи ахәаԥшыҩцәа дырбара.
"Даара угәы иахәаратәы иҟан иахьа ҽынлатәи асеанс ахь ахәыҷқәа ахьааргоз. Урҭ реиҳараҩык раԥхьаӡа акәны ирбон абалет", — лҳәеит лара.
Адунеи иахыҵәаз абзиабара аҭоурых аԥсуа сценаҟны ицәырыргеит атеатр асолистцәа, акәашацәа.
Џьулетта лпартиа налыгӡеит жәларбжьаратәи аконкурсқәа рлауреат, атеатр адиректор хада Лиудмила Титова, Ромео ироль – жәларбжьаратәи аконкурсқәа рлауреат Сергеи Скворцов. Скворцов иажәақәа рыла Аурыс драматә театр аҟны зегьы профессионала еиҿкаауп.
"Раԥхьаӡа акәны аԥснытәи ахәаԥшыҩцәа рҿаԥхьа ҳақәгылоит. Иахьа ҳааит арахь, ҳшааиз еиԥш ҳақәгылоит. Уаҵәа аҩныҟа ҳхынҳәуеит. Аԥсны уаҩҵас абаразы аамҭа ҳамам, убри азы агәаҳәара ҳамоуп аҽазныкгьы арахь ааразы", — иҳәеит Скворцов.
Аҵыхәтәантәи аамҭазы Аурыс драматә театр Аԥсны аҟазараҿы аԥыжәара змоу ҭыԥны иҟоуп иҳәеит Акультура аминистр лхаҭыԥуаҩ Баҭал Кобахьиа.
"Иахьатәи азал ҭәын ауаа арахь иааиуа иалагеит избанзар ирымоуп агәрагара араҟа ргәы иахәаша рбап ҳәа. 30 шықәса инарзынаԥшуеит Аԥсны абалеттә театр ықәымгылеижьҭеи. Ари хҭысуп", — иҳәеит Кобахьиа.
Атеатр адиректор хада Иракли Хынҭәба агәра игоит аспектакль ахәаԥшыҩцәа анырра рнаҭеит ҳәа. "Ари Аԥсназы иуникалтәу хҭысуп. Сгәы иаанагоит ԥхьаҟагьы абри аганахьала аусурақәа ирыцҵатәуп ҳәа", — иҳәоит Хынҭәба.
Аклассикатә балет атеатр шьаҭаркын 2002 шықәса рзы. Шықәсык аҩныҵҟа 100 рҟынӡа спектакль ықәнаргылоит еиуеиԥшым атәылақәа рҟны (Мексика, Германиа, Скандинавиа, Австриа, Даниа, Норвегиа, Италиа уҳәа рҟны).
Аԥснытәи Аҳәынҭқарратә аурыс драматә театр аҟны иқәыргылан аспектакльқәа ҩба: "Золушка" "Ромеои Џьульеттеи".
Атеатр абҵара 22 рзы Шәача иқәнаргылараны иҟоуп аспектакль "Кармен". Ԥхынҷкәын Аурыс драматә театр аҟны имҩаԥысраны иҟоуп Урыстәыла жәлар рартист Авангард Леонтьев имоноспектакль "Наше все — Фазиль Искандер".
