АҞӘА, абҵара 23 – Sputnik, Бадраҟ Аҩӡба. Астол гьежь "Общественно-политическая ситуация в стране — пути выхода из кризиса" мҩаԥысит Аҟәа. Аԥсны иарбанызаалак ажәлар реиҟәшара ыҟан иҟам иҳәеит аполитикатә партиа "Демократическая Абхазия" ахантәаҩы Астамыр Логәуа астол гьежь аҟны дықәгылауа.
"Сара исзеилкаауам иарбан еиҟәшароу зыӡбахә шәымоу. Ҩажәа-ҩажәихәҩык злоу ҳполитикатә елита, зажәа еинымаалаз ракәымзар егьырахь аӡәгьы деиҟәшаӡам. Ажәлар шыжәлару иҟоуп", — иҳәеит иара.
Логәуа иазгәеиҭеит ажәлар ракәым еиҟәшоу аполитикатә елита роуп ҳәа.
Логәуа иажәақәа рыла апартиа "Демократическая Абхазия" атәыла аполитикатәи ауаажәларратәии еиҿкаарақәа зегьы аус рыцнауеит иарбанызаалак уадаҩрак аҵаӡамкәаны.
"Ҳара иарбанызаалак азҵаара алацәажәара ҳалҳаршоит гәеизынхарада", — иҳәеит иара.
Астамыр Логәуа инаҵшьны иазгәеиҭеит амчреи аоппозициеи ишақәнагоу еиԥш аиҿцәажәара ахьрылымшо атәыла аҿиара иаԥырхагоуп ҳәа.
2014 шықәсазтәи ахҭысқәа дрылацәажәо Астамыр Логәуа иҳәеит урҭ Аԥсны аимидж ашьҭахра иаԥырхагамхазар ишамыхәаз.
Атәылаҟны аҭагылазаашьа ҭышәынтәаларц азы аполитикатә мчрақәа зегьы аус еицыруазароуп ҳәа иԥхьаӡоит иара.
Астол гьыжь "Общественно-политическая ситуация в стране — пути выхода из кризиса" еиҿыркааит аполитикатә партиақәа: "Народный Фронт Абхазии за справедливость и развитие", "Демократическая Абхазия", "Современная Абхазия".
