АҞӘА, абҵара 24 – Sputnik, Роберт Џьопуа. Донецктәи Жәлар рреспублика аԥеиԥш Минсктәи аиқәшаҳаҭрақәа рынагӡашьа иахьыԥшуп иҳәеит Донецктәи Жәлар рреспублика Жәлар Рхеилак ахантәаҩы Денис Пушилин.
"Минсктәи апроцесс ацашьа, аиқәшаҳаҭрақәа нагӡахар — ԥеиԥшк ҳзыԥшуп, инагӡамхар — аҽа ԥеиԥшк ҳауеит. Ҳәарада ҳара иаҳхықәкуп Урыстәылатәи Афедерациа иахьынӡалшо аҩызара, адгылара. Иахьазы ахьыԥшымра алацәажәара иаамҭам, избанзар Донецктәи Жәлар республика аҵакырадгьыл зегьы хылаԥшра аҳҭом. Аокуппациаҿ иҟоу ажәлар рзымхәыцра иашам", — иҳәеит Пушилин.
Иара убасгьы далацәажәеит иахьатәи Украинеи дареи реизыҟазаашьа уаҵәтәи амш аманы ишыҟам. Иҟоу аҭагылазаашьа алҵразы вариантк аҳасабала Пушилин иазиԥхьаӡоит аконфедерациа аԥҵара.
"Минсктәи аиқәшаҳаҭрақәа рҟны ишазгәаҭо еиԥш иҟоуп авариант – Украина зегьы аиҭакра. Урҭ аиқәшаҳаҭрақәа иалдыршоит аконфедеративтә Украина аҟазаара, иарбанызаалак арегион ианаиуа алшара иахәҭаны иашьо ахымҩаԥгара анагӡара. Уи ауп ҳара аханатәгьы иаҳҳәоз", — иҳәоит иара.
Украина, Денис Пушилин иажәақәа рыла ахаангьы еилазааракны иҟамызт, убри азы атәыла анапхгара амчра напык ахь аиагара рҽаназыршәа, аибашьрахь икылнагеит.
