АҞӘА, абҵара 30 — Sputnik, Владимир Бегунов. Аспектакль "Аихатәы мҿыԥҟаҩы" апримиера мышкы шагыз апресса рзы Аҟәа идырбан. "Аихатәы мҿыԥҟаҩы" асиужет еиҭанаҳәоит Дороти Оз атәылахь лнеираҟынӡатәи аҭоурых.
"Аспектакль ахәыҷқәагьы ирызкым адуқәагьы ирызкым уҳәар алшоит. Ахәыҷтәы хырхарҭа шамоугьы даара иҵаулоуп. Еиҳарак абжьарақәлеи иреиҳау ашколқәреи ирыҵанакуа ирзырхоуп", — иҳәеит РУСДРАМ атеатр адиректор Иракли Хынҭәба.
Аспектакль аҟны ицәыргоуп абзиабара, хақәиҭрала ак алхра, дҵаҟаҵарыла ак анагӡара аҽаршьцылара уҳәа реиԥш иҟоу атемақәа.
Атеатр адиректор иажәақәа рыла аофициалтә примиера аԥхьа апресса рзы аспектакль зӡыргахаз аҭыԥ аҟны агха-ԥхақәа раарԥшразоуп. Арҽеирақәа урыхьӡар алшоит мышкы-ҩымш рыла. РУСДРАМ адиректор иҳәеит атруппа гәҭакны ишрымоу ахәыҷтәы спектакльқәа ррепертуар ахыԥхьаӡара арҭбаара.
Раԥхьатәи ахәыҷтәы спектакль "Акәты еиқәаҵәа" апримиера мҩаԥысит жьҭаара алагамҭаз. 2017 шықәса рзы иқәыргылахоит аҽа спектаклькгьы.
Уажәы имҩаԥысуеит апиеса алыԥшааразы аусурақәа. Ашықәс ҿыц азы Аурыс драматә театр аԥснытәи ахәыҷқәа рзы иархиоит ашықәсҿыцазтәи ақәгыларақәа. Урҭ мҩаԥысраны иҟоуп ԥхынҷкәын 26 инаркны, мышкахьы ҩынтә.
Апиеса "Аихатәы мҿыԥҟаҩы" иҩит аурыс драматург Виктор Ольшански, Френк Баум илакә амотивқәа рыла. Аспектакль ықәлыргылеит арежжисиор Нина Балаева, асахьаҭыхыҩ-ақәыргылаҩ ҳәа дыҟоуп Архип Лабахәуа, алашара ақәыргылаҩыс ҳәа дааԥхьоуп Сергеи Мартынов. Мартынов ҩымш ҳәа Аҟәаҟа дааит. Иара иусумҭаны иҟоуп 250 спектакль лашарала реиқәыршәара.
