АҞӘА, ԥхынҷкәын 5 – Sputnik, Рада Ажьиԥҳа. Аԥсны Ахада Иусбарҭаҟны амассатә информациа ахархәагақәа рымадаразы аусҳәарҭа аиҳабы Алхас Гагәылиа ажурналистцәа дыдирдырит Аԥсны Ахада ипресс-маӡаныҟәгаҩ ҿыц Наала Аҩӡыԥҳа.
"Атәыла Ахада Рауль Ҳаџьымба ауаажәларра, аҭыԥантәии аҳәаанырцәтәии АИХ-қәа (СМИ) рацәажәара еснагь дазыхиоуп. Сара, пресс-маӡаныҟәгаҩык иаҳасаб ала усны сҿаԥхьа иқәгылоу арҭ аимадарақәа реиқәырхареи рырҿиареи роуп, иара убасгьы Ахада еиуеиԥшым азҵаарақәа рзы ипозициа ауаажәларра рызнагароуп. Иуҳәар алшоит атәыла Ахада ԥхьаҟагьы иусура шаарту инхоит ҳәа", — лҳәеит Наала Аҩӡыԥҳа.
Абри амаҵзура уаанӡа дахагылан Хьыбла Возԥҳа. Уи уажәы диагоуп Аԥсны Ахада Иусбарҭаҟны аҳәынҭпротокол аиҳабыс.
Наала Беслан-иԥҳа Аҩӡԥҳа диит 1991 шықәса, хәажәкыра 5 рзы, Аҟәа. 2013 шықәса рзы қәҿиарала далгеит МГУУ ("Жәларбжьаратәи аизыҟазаашьақәа" рфакультет). 2013-2015шш. рзы Аԥсны Адәныҟатәи аусқәа рминистрраҟны Аполитикатә ҟәша ареферент. 2014-2016 шш. рзы – Жәларбжьаратәи аинформациатә маҵзура Sputnik ԥсны акорреспондент.
