ГАГРА, ԥхынҷкәын 9 — Sputnik, Саида Жьиԥҳа. Ԥхынҷкәын 3 аҵхыбжьон ишьҭыҵыз амшын ацәқәырԥа иахҟьаны, ааха ӷәӷәа роуит, амшын аҟәара иаԥныз, Гагра ақалақь ӡыла еиқәзыршәоз ацәаҳәақәа.
"Мчыбжьык иалагӡаны, Гагратәи аӡыканал аусзуҩцәеи, аҳҭнықалақьынтә иааз аспециалистцәеи аԥхасҭа аԥырҟәҟәара иаҿын. Дара, аҭырқәа фирма ари аҭыԥ иавганы ишьҭарҵаз аӡымҩангагатә цәаҳәеи уаанӡа ишьҭаҵази еиԥшьны ақалақьуаа аӡы рырҭеит иацы. Аха ацәаҳәа ҿыц иамаз агра иахҟьаны, аӡы амчхара азышьҭымхкәа еиҟәшьеит", — иҳәеит Гагратәи аӡыканал анџьныр хада Михаил Саакиан.
Уеизгьы хәымш ӡыда иҟаз ақалақьуаа, сааҭк инарзынаԥшуа ирызнеиуаз аӡы еигәырӷьаарнӡа, ҩаԥхьа рылахь ааиқәылеит.
Аԥхасҭа ахьыҟалаз аус руоит Гагратәи аӡыканал аусзуҩцәа. Аусурақәа ҷыдала хылаԥшра рырҭоит Гагра араион Ахадара аиҳабыра.
Аҭыԥ аҟны аус зуа аспециалистцәа разгәаҭарақәа рыла, уаҵәы ашьыжь ақалақьуаа аӡы роуоит.
Иазгәаҭатәуп, мчыбжьык иалагӡаны, Гагра араион Ахадара амчала, ақалақь ӡыла аиқәыршәаразы аус шыруаз аӡымҩанызгоз амашьынақәа.
