АҞӘА, ԥхынҷкәын 12 – Sputnik, Роберт Џьопуа. Ауаҩы ашьха аԥсшьара агәабзиара зҩыда инаҭоит ҳәа иазиԥхьаӡоит ашьха-ныҟәаратә туризм аинструктор хада Валери Агрба.
"Ашьхақәа — сара исыԥсҭазаароуп. Зегьы ирабжьызгоит аԥхын мчыбжьык иадамзаргьы ашьха ицаны рыԥсы ршьарц. Ашьхақәа ауаҩы агәабзиара ирҭоит, ара иҟоу аҳауатә ҭагылазаашьа аҽаџьара иуԥылом. Аҿаргьы ирзеиӷьымзар ирзеицәам ашьхаҟа ацара. Ҳашьхақәа ҳара ҳрыхьчоит. Ииашаны ахәыцрақәа рахь ҳкылыргоит. Иуҳәар ауеит ашьхақәа ауаҩы драаӡоит ҳәа", — иҳәоит Агрба.
2003 шықәса ажьырныҳәамзазы 57-тәи ООН Ассамблеиа хада аҟны ишырыӡбаз ала Жәларбжьаратәи ашьхақәа рымш азгәарҭоит ԥхынҷкәын 11 рзы.
ООН Ассамблеиа хада жәларбжьаратә ауаажәларратә еилазаара рахь ааԥхьара ҟанаҵеит абри амш аҽны еиуеиԥшым ауснагӡатәқәа мҩаԥыргаларц, апланета ашьхатә регионқәа рпроблемақәа разхьарԥшрази уа инхо ауаа рҭагылазаашьа аиӷьтәрази.
