АҞӘА, ԥхынҷкәын 20 – Sputnik, Бадраҟ Аҩӡба. Х-нызқь инареиҳаны аԥсуа паспорт ҿыцқәа аус рыдулоуп, иҳәеит АРСМИРА аҟны имҩаԥгаз апресс-конференциаҟны Аԥсны Аҩныҵҟатәи аусқәа рминистрра апаспорттә усбарҭа аиҳабы Едуард Манаргиа.
"Атәылауаа паспортла реиқәыршәара аусхк хацыркын 2016 шықәса, лаҵарамзазы. Атехника ҿыц аагоуп. Уи аус адулашьа иахьазы ишахәҭоу имҩаԥызго ауаа ҳамоуп", — иҳәеит иара.
Манаргиа иажәақәа рыла иаарласны Гал, Цандрыԥшь, Бзыԥ рҟны иқәыргылахоит апаспортқәа рыҭараз атехника.
"Зехьынџьара адокументқәа рыдкылара мҩаԥыргоит. Афымцалашара андырцәо апроблемақәа ҳазцәырҵуеит, аха сгәы иаанагоит ауаа ҳаилыркаап ҳәа", — иҳәоит Едуард Манаргиа.
Иара иажәақәа рыла адокументқәа анрыдыркылалак ашьҭахь 15 мшы рыҩныҵҟа апаспорт ҿыц рыҭара алыршахоит.
"Апаспорт аиура аамҭа аҭахуп агәаҭара ҷыдақәа раан. Агәаҭара ҷыда иахрыжьуеит аусӡбара иахысхьоу ауаа", — иҳәеит иара.
Аԥсны Аҩныҵҟатәи аусқәа рминистрра апаспорттә усбарҭа аиҳабы ихаҭыԥуаҩ Роман Ӡаԥшьба иҳәоит апаспорт аԥсахраан ишаҭаху: ажәытә паспорт, афотосахьа, абанк аҟынтәи ашәҟәы.
Едуард Манаргиа иазгәеиҭоит апаспорттә усбарҭа ишыҭнаҵаауа апаспорт азы раԥхьатәи ашәҟәқәа реиҿкаашьа. Иара убасгьы иҳәоит ажәытә паспортқәа русура аҿҳәара шынҵәо 2018 шықәса анҵәамҭазы.
Адокумент ҳаамҭа иақәшәо, иахәҭоу ахьчаратә ҟазшьақәа аман иҟаҵоуп.
