Алакә "Асы Аҳкәажә" адраматә театр аҟны иқәыргылахоит ԥхынҷкәын 26 рзы

© Sputnik / Томас ТхайцукАрежиссиор Мадина Аргәынԥҳа
Арежиссиор Мадина Аргәынԥҳа - Sputnik Аҧсны
Анапаҵаҩра
Ԥхынҷкәын 26, Самсон Чанба ихьӡ зху Аԥсуа драматә театр аҟны, Ганс Христиан Андерсен иҩымҭала аспектакль "Асы Аҳкәажә" апремиера мҩаԥысран иҟоуп. Аспектакль ықәлыргылоит арежиссиор Мадина Аргәынԥҳа.

АҞӘА, ԥхынҷкәын 21 — Sputnik, Рада Ажьиԥҳа. Ганс Христиан Андерсен иҩымҭа "Асы Аҳкәажә" ала иқәыргылоу аспектакль аҟны ихадо ахаҿсахьа Герда, дныҟәоит аамҭаҿы, уи ауп ҿыцрас иалагалоу ари зегьы еицырдыруа алакә, ҳәа лҳәеит арежиссиор Мадина Аргәынԥҳа.

"Ари алакә зегьы ирдыруеит, ҿыцрас иҟоу ҳәа акгьы ыҟам, аха ҳара ҳтәала елементк алаҳгалеит, ахаҿсахьа хада — Герда, алакә аҟны абна дылоуп, ауаа лԥылоит, ҳара ҳаспектакль аҿы лара дныҟәоит аамҭа дагәылоуп. Аспектакльқәа иқәсыргыло зегьы иҿыцу блала избоит. Исызҿыцуп сара ари атема. Аинтернет, ателевизор аҟны ахәыҷқәа ирбахьазар акәхап ари алакә, аха ҳаспектакль аҟны адинамика аҽакыуп", — ҳәа лҳәеит арежиссиор.

Мадина Аргәынԥҳа лажәақәа рыла, Ганс Христиан Андерсен иҩымҭала иқәыргылоу аспектакль "Асы Аҳкәажә" атеатр арепертуар иалагалахоит, иара зызку ахәыҷқәа роуп.

"Ари аспектакль иаҳгәиҭоуп атеатр арепертуар аҟны ааныжьра, избанзар ахәыҷқәа ирызку еснагь актуалра амоуп. Ажәакала, ахәыҷқәа ирызку аспектакльқәа еизгатәуп, ахәыҷқәа атеатр иадыԥхьалатәуп", — хәа азгәалҭеит лара.

Арежиссиор илҳәеит, ароль хада шыналыгӡо актриса Хьыбла Мықәԥҳа, актиортә еилазаара акәзар атеатр атруппа аҟнытә жәохә-ҩык алахуп. Аспектакль адекорациақәа азлырхиеит асахьаҭыхҩы Диана Допуаԥҳа.

"Ари аспектакль азы адекорациақаә реиқәаршәараз дааҳаԥхьеит асахьаҭыхҩы Диана Допуаԥҳа. Лареи сареи акыр ҵуеит аус еицаҳуеижьҭеи, ари аспектакль азын иӡбны иҳамаоуижьҭеи адекорациақәа, акостиумқәа. Атеатр аиҳабы Адгур Џьениа ибзоурала, ҳагәҭакы наӡарц аҭагылазаашьа ҳаиҭеит", — ҳәа ацылҵеит уи.

Ганс Христиан Андерсен иҩымҭала иқәыргылоу аспектакль "Асы Аҳкәажә" апремиера мҩаԥысран иҟоуп ԥхынҷкәын 26 рзы, Самсон Чанба ихьӡ зху Аԥсуа драматә театр аҟны.

Ажәабжьқәа зегьы
0